పుజారాను సన్మానించిన బీసీసీఐ

టీమిండియా బ్యాట్స్ మెన్ చటేశ్వర్ పుజారా మరో ఘనతను సొంతం చేసుకున్నాడు. టెస్టుల్లో 100 మ్యాచ్ లు ఆడిన ఆటగాళ్ల జాబితాలో చేరాడు. భారత్ నుంచి పుజారాతో కలిపి ఇప్పటి వరకు కేవలం 13 మంది మాత్రమే ఈ ఘనతను సాధించారు. ఈ సందర్భంగా పుజారాను బీసీసీఐ ఘనంగా సత్కరించింది. ఢిల్లీ వేదికగా ఆస్ట్రేలియాతో జరుగుతున్న రెండో టెస్టు సందర్భంగా క్రికెట్ దిగ్గజం సునీల్ గవాస్కర్ చేతుల మీదుగా పుజారా ప్రత్యేక క్యాప్ ను అందుకున్నాడు. ఈ కార్యక్రమానికి పుజారా కుటుంబ సభ్యులు కూడా హాజరయ్యారు. మరోవైపు ఈరోజు మైదానంలోకి అడుగుపెడుతున్న సమయంలో పుజారాకు సహచర ఆటగాళ్లు గార్డ్ ఆఫ్ ఆనర్ తో గౌరవించారు. వరుసగా నిలబడి ఆయనకు గార్డ్ ఆఫ్ ఆనర్ ఇచ్చారు.